رجعوا الحبايب _ بقلم : أميره صليبه

ياصبح ليش رجعت مابيّن حدا

لاظل لا خيّال لاصوت وصدى
أظلم عليي الليل خوّفني العتم
وسمعت دعسي وقلت راجع عالهدى

نطرتك على الشباك ماطلّ القمر
ما أظلمك ياليل جبلي شي خبر
لوطيفك بهالعتم من يمي عبر
من صوت نهداتي ترى كان اهتدى

حطيت جوا الموقده شوية حطب
وركوة القهوه ناطره بتغلي بعتب
وموال بيرندح متل ناي القصب
دروب الحبايب بالشتي ما أبعدا

جهجه الضو ورحَّل العتمي معو
وقلبي متل نار بجمر ما بتسمعوا
ياغايبن بعيد لش مابترجعوا
شوفوا الليالي بالشتي ما أسودا

شو صار حتى يطوّل غيابك سني
بتعرف بِبعدك هالدني منّا دني
خدني على دربك لقلبك ردّني
حبي إلك مالو حدود ولامدى

كانون عم بيدق بابي بيسألو
شوغيَّرو قلبك شو يلي بدَّلو
هالقلب غيرك عالعمر مافي إلو
شمّتوا القرايب والعوازل والعدا

ما بسامحك ماعاد في عندي صبر
عمتمرق الأيام رح يمضي العمر
لاتبعت مواويل وغناني و عطر
هي ريحتك بالقلب بدي أطردا

وشفتك كأني نسيت وغمرتك غمر
هاليوم بيساوي سنيني والعمر
ضاع العتب واللوم وانزاح القهر
يارجعتك روحي وعيوني بتسعدا

#سفير_برس _ بقلم : أميره صليبه