حكي بناغش القمر ..بقلم : عبير شحادة
#سفيربرس
إعلان
شبّاك جرحي
ع السّما مفتوحْ
وبوابْ قلبي
مسكّرا كلّا
وعصفور ع السّكت
بيجي وبيروح
ملحْ الجرح
عصفور ما خلّا
جروح البشر
بتساع جوّا الرّوح
وجرحي أنا ع غيمتو علّا
مقروح
وياصوت الوجع مبحوح
و الآه طاحت بِ حضن اللّه
****
عرف بنت حبّت صبي
أول ما وج الضّو
شقرق بالندي
من ضحكتو
غزلت شي دزينة عبي
وكل يوم بتنقي عباية ترحلها
تسرق حلا من كحلها
زرار الورد ع ميلتا تفتحلها
قديش حلو الصبح
لما بضحكي بيبتدي
وقديش حلوة هالبنت
والأحلى ضحكات الصبي
****
قومي تَـ نكتب من بدا وجديد
وراق العمر تشّت من التنهيد
حطّي ع أول سطر كم نقطة
بكمّل انا بعدك
شحطة ورا شحطة
وتبقي انتبهي
الحبر بعدو جديد
ومدّدو بدم الوريد
ليكي ايديكي زهّرو
وكسور روحي جبّرو
هيدا حبر سحرو مديد
قومي نغنّي للدني أحلى قصيد….
#سفيربرس ـ بقلم : عبير شحادة
إعلان