مع الوقت.. بقلم :هبة دهمان
#سفيربرس _فيينا
في أشياء ما بتعرفها عن حالك إلا بعد ما يمر الوقت. أشياء كنت بتظن انها بعيدة عنك وبعدين تكتشف إنك صرت تحبها من دون ما تنتبه …
رح يجي يوم تلاقي حالك بتحب أكل البيت أكتر من أكل المطاعم مو لأن المطاعم بطّلت تعجبك بس لأنك صرت تلاحظ طعم الأكل البسيط وراحة الأكل اللي بتعرف شو موجود فيه ورح تكتشف إن في أكلات صحية كنت تمرق من جنبها وما تعطيها أي اهتمام وبعدين بتصير من أكتر الأشياء اللي بتشتهيها.
رح تحب الرياضة بطريقة مختلفة … مو بس كرمال شكل جسمك بس كرمال الإحساس اللي بتتركه فيك.
رح تلتزم أكتر وتصير تشوف ساعة بالنادي أو مشي طويل أو حتى حركة بسيطة إلها علاقة براحتك النفسية قبل أي شي تاني.
ورح تستغرب من حالك لما تكتشف إن الضجة اللي كنت تحبها صارت تتعبك.
الأماكن المزدحمة الأصوات الكتيرة السهرات اللي كانت تمرق بسرعة… يمكن تصير تحتاج بعدها وقت لحالك حتى ترجع تسمع صوتك من جديد.
ورح تحب تطلع مشوار لحالك تمشي بلا هدف واضح، تقعد بمكان هادي تشرب قهوتك تشوف الناس، أو بس تترك أفكارك تمشي براحتها.
ورح تكتشف إن الوحدة مو دايماً معناها إنك وحيد أحياناً معناها إنك مرتاح مع نفسك.
رح تحب التأمل والصفن …. اللحظات اللي ما فيها شي عم يصير ومع هيك بتحس إنها مليانة.
تطلع من الشباك، تمشي بالطريق، تسمع أغنية، وتسافر شوي جوات راسك. أشياء كنت تعتبرها «و لا شي»، تصير مع الوقت من أثمن أوقاتك.
ورح تحب أشياء ما كانت أصلًا على بالك … ألوان ما كنت تختارها ، أماكن ما كنت تتحمس تزورها، موسيقى ما كنت تسمعها، تفاصيل صغيرة ما كنت تشوف إلها قيمة…. كأن الحياة مع الوقت ما عم تضيف لك أشياء بس… عم تغيّر الطريقة اللي بتشوف فيها الأشياء القديمة كمان.
يمكن أكبر تغيير بيصير فينا مو إنو نصير أشخاص تانيين، إنما إننا نرجع نكتشف حالنا من جديد بس بهدوء أكتر.
بتصير تعرف شو بيريّحك، شو بيتعبك، شو بيشبهك، وشو كنت تعمله بس لأن الكل كان يعمله.
وبتصير تفهم إن النضج مو إنك تحب أشياء جديدة وبس ،النضج إنك ما تعود مضطر تبرر ليش بطلت تحب أشياء كنت تحبها.
يمكن الحياة ما بتغيّر ذوقنا… يمكن هي بس بتعلّمنا نسمع حالنا أكتر.
#سفيربرس_هبة الله دهمان_فيينا
