رمضانيات شاميّة ـ “جيـــبة التاجـــر ” ـ .. مع الأستاذة خلود بزرتو

ما أسرع خطاك يارمضان تأتي على شوق وتمضي على عجل …
فسبحان من وصفك بأيام معدودات .
فإن بلوغ رمضان نعمه كبيرة على من بلغه وقام بحقه بالرجوع إلى ربه من معصيه إلى طاعه …ومن الغفله عنه إلى ذكره ومن البعد إلى الإنابة إليه .

💭نصيحة اليوم 💭

تناول التمر قبل أي شئ لأنه يعمل على سد نقص السكر الذي حصل للجسم أثناء فترة الصيام .

معنا اليوم صبية صغيرة وحلوة ونفسها كتير طيب بالأكل

💥المهندسه جودي الريحاني 💥

قدمت لنا أكلة “جيبة التاجر “

استمع للوصفة بالصوت:

🗯المكونات والطريقه🗯

أول شي منجهز العجينة :
٣ كاسات طحين
٣ معالق كبار سكر
معلقة كبيرة خميرة فورية
معلقة صغيرة بكمبودر
معلقة صغيرة ملح
كاسة حليب سائل دافي
ربع كاسة زيت ذرة
منحط المي والخميرة ومنستنا شي دقيقتين لتتفاعل الخميرة
وبعدا منحط باقي المكونات ومنعجنها منيح واذا احتاجت سوائل منحطلا مي دافية ومنغطيها ومنتركا تختمر وترتاح شي ساعتين.
وفيكن تعملو أي عجينة بدكن ياها (مثلاً عجينة العشر دقايق) انا اليوم عملت هي الطريقة حبيت جربها .

منجي لنجهز الحشوة :
بقطع صدور الجاج مربعات صغيرة
وبحط بالطنجرة معلقة زيت ومعلقة سمنة
وبقلي الجاج فيهن
و بحطلن ملح ، فلفل ، كاري ، بهارات ماجي ، بهارات شيش ، توم بودرة ، بهارات بابريكا
وبس يستو بشيلن ع جنب ليبردو.

مكونات أضافية:
جزرة مبروشة
ملفوف مبروش أو مقطع
مخلل بخيار مقطع مربعات صغيرة
مايونيز
شوية خردل ما منكتر لأن طعمتو قوية
طبعاً كمية هالقصص بتختلف ع حسب كمية الجاج الي عاملينا
بخلطن كلن مع بعضن
وبحطن فوق الجاج وبحركن منيح.

بعدا بس تختمر العجينة برقها وبقطعا دوائر بالكاسة أو أي شي دائري وبحطا بالفرن ( بس مو فوراً بخليها ترتاح شوي بالصينية ) وبس تستوي وتتحمر بطالعا
بس يبردو شوي بفتحن وبحط لكل وحدة قطعة خس ومن الحشوة الي عملتا
وصحة وهنا 😋

🌹دعاء اليوم 🌹

يارب يامن أذا دعي أجاب ، ياسريع الحساب ، يارب ياكريم ،اللهم اكتب لنا الخير والمودة والوئام ، اللهم ارزقنا حبك وحب من يحبك ،وحب كل عمل يقربنا إلى حبك .

# سفيربرس ـ الأستاذة خلود بزرتو ❤