ومضات إيجابية ـ الكلمات الجارحة ـ .. مع الأستاذه غالية اسعيد

ومضات إيجابية ـ الكلمات الجارحة ـ .. مع الأستاذه غالية اسعيد ـ الحلقة السابعة عشر

بيقولوا ومن فمك أدينك … كلمتين يمكن تبني مشاعر أنسان وبالمقابل يمكن تهد غيرو، شوية حروف جمعناها بكلمات وعطيناها روح الحديث، يا بتكون عن ترفع للعالي، يا عم تبكي ليالي.
مين منا ما سمع بالكلمات الجارحة، الكلمات يلي بتوجع لما تطلع خاصة من حدا من حبو كتير، الكلمة يلي ياما بكتنا، ووجعتنا، وخلتنا أيام وليالي عم نفكر فيها، وتركت بقلوبنا أسى كتير كبير، يمكن لسى لهلاء في حدا منا عم يعاني منو، كتير من الناس بيجهل كيف ممكن تأثر الكلمة فينا، وقديه ممكن تأثيرها يكون ملموس بحياتنا؟ …
الجواب بالتأكيد نعم، لأن لما تكون الكلمة حادة، وجارحة، وبتوجع القلب بتصيير متل السكين عندها القدرة تصل للأعماق وتجرح بقوة وتتسبب بنزيف مستمر من المعاناة والكآبة، بس الكلمة الطيبة متل الشجرة الطيبة أصلها ثابت وفرعها في السماء تؤتي ثمارها ولو بعد حين، الفرق بين الكلمة الطيب والكلمة الجارحة هو اختيار الحروف والسبب والنبرة الصوت لهيك قالوا عن الكلمة فن، فارسمها بإتقان، كي يكتمل اللحن بحب.

وبهاد الشي علماء النفس أكدوا أن الكلمات الجارحة سميت جارحة لأنها بتسبب جروحاً حقيقية في الدماغ وتميت عدة خلايا أو تتلف عملها، مسببة نوعاً من العطل في التفكير، ولهاد السبب بيعاني الشخص المجروح آلاماً نفسية وشعوراً سلبياً وإحباطاً، موبس هيك، يمكن كتير كمان يتحول الشخص المجروح لشخص فاشل غير منتج، مدعوم الإحساس، مخدر العواطف.
ولهيك الكلمات الحلوة الجميلة إلها تأثير السحر مو بس على المستوى النفسي والمعنوي فقط، لاء كمان إلها تأثير على المستوى الصحي والجسمي‏، وبظن ما فينا حدا ما جرب هالشي وعرف قديه بتأثر الكلمات الجارحة فينا وكتير.
‏ فالكلمة الطيبة تؤثر على الروح المعنوية للإنسان فتجعله منشرح الصدر، فرحاً سمحاً مبتهجاً قادراً على مصالحة نفسه ومصالحة الآخرين، لكن بشرط أن تكون تلك الكلمة نابعة من القلب وليست مجرد مجاملة‏،‏ أو كلمات جوفاء فقط.
صدقني الكلمة الطيبة أو البشعة ما بتكلفك أكتر من شوية مشاعر وإحساس، خلونا نحكي بحب ورفق ولين، ونطيب قلوب بعض، لأن نحنا هلاء بأمس الحاجة لهيك شي وصدق مين قال: الكلمة الطيبة شجرةٌ مورقةٌ إذا وقعت في القلب أحيته.

#سفيربرس ـ بقلم : الأستاذة: غالية اسعيّد. .